एक दिने शैक्षिक भ्रमण - करुणा ओझा

 

एक दिने शैक्षिक भ्रमण

-        करुणा ओझा

रूपा -२, थुम्की, कास्कीमा अवस्थित आधारभूत तहदेखि माध्यमिक तहसम्म रहेको श्री शिवालय माध्यमिक विद्यालयमा अध्ययनरत विद्यार्थीहरूका लागि पोखराका विभिन्न प्रसिद्ध स्थल तथा पर्यटकीय स्थल भ्रमण गर्नका लागि मिति २०७९/०८/१२ गते एक दिनको लागि शैक्षिक भ्रमणको आयोजना गरियो ।

हामी जम्मा भ्रमणमा समावेश साथीहरू र शिक्षक गरी करिब ६१ जना रहेका थियौँ । भ्रमणका लागि हामी बिहान ६ बजे विद्यालयमा भेला भई नास्ता गरेर ठिक ७ बजे थुम्की प्रतीक्षालयबाट बस चढेर यात्रा सुरु गर्‍यौँ । यात्राको क्रममा निकै रमाइलोका साथ बसबाट विभिन्न प्राकृतिक दृश्यको अवलोकन गर्दै हामी छोरेपाटन हुँदै सिधै पुम्दीकोट वा शिव मन्दिर दर्शन गर्न गयौँ । त्यस मन्दिरमा विभिन्न मूर्तिहरू पनि रहेछन् । हिमशृङ्खलाहरू (अन्नपूर्ण, माछापुच्छे जस्ता हिमाल अवलोकन गर्न पनि पाइने रहेछ । साँच्चिकै भन्नुपर्दा त्यस स्थल घुम्नै पर्ने रहेछ भन्ने हामीलाई महसुस भयो । हामीले त्यहाँ एकल तथा तथा सामूहिक फोटो खिच्यौँ र त्यहाँबाट फेरि हामी घुमघामतर्फ लाग्यौँ ।

हाम्रो यस शैक्षिक भ्रमण निकै ज्ञानवर्धक र मनोरञ्जनात्मक भयो । आगामी दिनहरूमा पनि यसरी नै शैक्षिक भ्रमणलाई निरन्तरता दिनुहुने छ भन्ने आशाका राखेका छौँ ।

त्यसपछिको हाम्रो गन्तव्य शान्ति स्तुपा बन्यो । शान्ति स्तुपामा एकदमै शान्तका साथ जुत्ता चप्पलसमेत हामीले बाहिर खोलेर त्यस स्तुपामा प्रवेश गर्यौँ । त्यहाँबाट देखिने विभिन्न ताल, तलैया, पोखरा उपत्यकाको दृश्य अवलोकन गर्यौँ । त्यहाँ धेरै दिशातिर भगवान् बुद्धको मूर्तिहरू टाँसिएका थिए । त्यहाँको वरपर घुमेर हामी पुनः बस चढी गुप्तेश्वर गुफा गयौँ । त्यहाँ हामी सबै लामबद्ध भएर गुप्तेश्वर गुफामा प्रवेश गर्यौँ । त्यहाँ आश्चार्य लाग्दा दृश्यहरू रहेछन् । पाताले छागाँको पानी त्यस गुफामा आइपुग्यो भन्ने भनाइ रहेछ । त्यहाँ हामी ४५ मिनेट जति गुफा घुमेर विभिन्न भगवानको मूर्तिहरू कोरेको हेर्दै निस्कियौँ । त्यहाँबाट रामबजार भन्ने ठाउँमा हामीले दिउँसोको १ बजे खाना खायौँ । हामीले खाना खाएर अन्तर्राष्ट्रिय पर्वतीय सङ्ग्रहालय गयौं । हामी सबै लामबद्ध भएर स‌ङ्ग्राहलयभित्र प्रवेश गर्यौँ । त्यस सङ्ग्रहालयभित्र नेपालका जातजाति, भाषाभाषी, धर्म, संस्कृति र वेषभूषालाई छर्लङ्‌ग पारेर राखिएको रहेछ । त्यति मात्र नभएर विभिन्न जीवजन्तु तथा जनावरहरूको अस्थिपञ्जर प्रणालीसमेत राखिएको रहेछ । हाम्रो नेपालमा पहिलो पटक हिमाल आरोहण गर्ने नेपाली महिला पासाङल्हामु शेर्पाको सचित्र वर्णनसहित हिमाल आरोहण गर्दा प्रयोग गरिने सामग्री र पोशाकसमेत अवलोकन गर्ने अवसर पायौँ । साँच्चिकै त्यस सङ्ग्राहलय हाम्रो लागि निकै ज्ञानवर्धक रहेको थियो । सङ्ग्रहालयबाहिर एउटा हिमालको नमुना पनि रहेको थियो । त्यस हिमालको नमुनामा हामी केही समय रमाइलो गर्यौँ र पुनः हामी घुमघामतर्फ लाग्यौँ । त्यहाँबाट हामी पोखराको निकै पर्यटकीय स्थल फेवाताल गयौँ । हाम्रो समयको कारणले गर्दा तालबाराही मन्दिरसम्म पुग्न नसके पनि वारिबाटै अवलोकन गर्दै हाम्रो प्रसिद्ध धार्मिक स्थल विन्ध्यवासिनी मन्दिरतर्फ लाग्यौँ र हामी लामबद्ध भएर मन्दिर प्रवेश गर्यौँ । मन्दिरको दर्शन गरी त्यहाँबाट देखिने पोखरा उपत्यकाको दृश्य साथै त्यस मन्दिरभित्र रहेका शिवलिङ्‌ग र बगैंचा घुम्यौं ।

त्यहाँबाट हामी खाजा खानका लागि अमरसिंहमा केही समय बस रोक्यौं र खाजा खाँदै हामी बसमा रमाइलो गर्दै ठिक ७ बजे सबै आ-आफ्नो घर फर्कियौँ । यसरी हाम्रो एक दिने शैक्षिक भ्रमण निकै रमाइलो भयो ।

हाम्रो यस शैक्षिक भ्रमण निकै ज्ञानवर्धक र मनोरञ्जनात्मक भयो । आगामी दिनहरूमा पनि यसरी नै शैक्षिक भ्रमणलाई निरन्तरता दिनुहुने छ भन्ने आशाका राखेका छौँ ।

कक्षा ८

भ्रमणका तस्बिरहरू यहाँबाट हेर्न सक्नुहुने छः